Malugiuk: Immikkoortoq una 2014-mi aappaassaa saqqummiunneqarpoq.
Saqqummersitaq siulleq 23. januaari 2014-mi saqqummertoq Ukiumoortumik Paasissutissat, 1. juli 2014-mi pissarsiarineqarsinnaavoq.
Inuit isertitaat
2013-mi isertitat takutippaat inuit qaffasinnerpaanik isertitallit tassaasut:
50-niit 54-nut ukiullit
Kalaallit Nunaata avataani inunngorsimasut
Angutit
Illoqarfimmi najugaqartut
Kommuneqarfik Sermersuumi najugaqartut
Taamaaqataanik misissueqqissaarnerup takutippaa inuit akissarsiakinnerpaasut tassaasut:
15-niit 19-nut ukiullit
Kalaallit Nunaanni inunngorsimasut
Arnat
Nunaqarfimmi najugaqartut
Qaasuitsup Kommuniani najugaqartut
Isertitat nunami agguarnerat
Agguaqatigiissitsinermi isertitat qaffasinnerpaat immikkoortortaqarfimmi Ivittuunippoq, immikkoortortaqarfimmi Ivittuuni inuit aggulussimanerat suliffeqarnikkullu tunngasut nunap sinneranut naleqqiullutik allaanerujussuupput.
Nunap sinnerani isertitat annertussusiat immikkoortortaqarfinni inuttunerusuni qaffasinneruvoq, immikkoortortaqarfinni inuttakinnerusuni annikinnerusoq.
Titartagaq 2.1. 2003, 2008 aamma 2013-mi inuit ataasiakkaat immikkoortortaqarfinnut isertitaat tamarmiusut agguaqatigiissinnerat
Najoqqutaq: Naatsorsueqqissaartarfik
Titartagaq 2.2. 2012-2013 isertitat tamarmiusut ineriartornerat immikkoortortaqarfinnut immikkoortillugit
Najoqqutaq: Naatsorsueqqissaartarfik
Titartagaq 2.3. 2013-mi inuit kommunini isertitaat illoqarfinnut nunaqarfinnullu immikkoortillugit
Najoqqutaq: Naatsorsueqqissaartarfik
Kommunerujussuit nutaat sisamat akornanni inuit ataasiakkaat isertitaat annertuumik assigiinngillat. Isertitat qaffasinnerpaat Kommuneqarfik Sermersuumiipput, appasinnerpaallu Qaasuitsuip Kommunianiillutik. Kommunerujussuit akornanni assigiinnginneq siullermik illoqarfinni agguaqatigiissillugu isertitat assigiinnginneranniippoq, nunaqarfimmiulli agguaqatigiissillugu isertitaat taamatut annertutigisumik nunami allaanerunatik. Taamaakkaluartorli Qeqqata kommuniani nunaqarfinni isertitat kommuninut allanut sanilliullugit annertunerusut takuneqarsinnaavoq, tamatumunnga Kangerlussuarmi isertitaqqortuneq pissutaavoq.
Isertitat inuit aggorsimanerannut agguarnerat
Innuttaasut isertitaat ukioqqortussutsinut tallimanut agguarnerisigut ukioqqortussutsit assigiinngitsut akornanni isertitat qaffasiffiisigut annertuumik nikingasoqarpoq. Ukiutigut agguarnernut taakkununnga agguaqatigiissillugu isertitat pingaarnertigut ukioqqortussutsinut pingaarnernut pingasunut agguarneqarsinnaapput.
Titartagaq 2.4. 2003, 2008 aamma 2013-mi inuit ataasiakkaat isertitaat tamarmiusut agguaqatigiissillugit ukiunut immikkoortiterlugit
Najoqqutaq: Naatsorsueqqissaartarfik
34-niit 64-nut ukiullit agguaqatigiissillugu qaffasinnerpaanik isertitaqartuupput. Tassunga pissutaanerusoq tassaavoq taamatut ukiullit inuussutissarsiorsinnaanerunerat.
15-nik 34-nut ukiullit utoqqaliartornerat malillugu agguaqatigiissillugu isertitat qaffakkiartorput. Tassunga pissutaasut ilagaat ilinniartut inuusunnersat akornanni amerlanersaanerat inuussutissarsiorsinnaanerallu taamaattumik appasillluni.
Inuit 70-it sinnerlugit ukiullit appasingaatsiartunik assigiiaartunillu isertitaqarput. Tassunga pissutaavoq inuit taakku ilarpassuinut utoqqalinersiutit isertitatuaanerat.
Titartagaq 2.5. 2013-mi inuit ataasiakkaat isertitaat tamarmiusut agguaqatigiissillugit ukiunut najugaqarfiinullu immikkoortillugit
Najoqqutaq: Naatsorsueqqissaartarfik
Ukiorisat tunngavigalugit pissuteqartumik isertitatigut assigiinngissuteqarnerujussuaq pingaartumik illoqarfinni atuuppoq, nunaqarfinnili isertitat ukiorisanik tunngaveqannginnerullutik. Ukioqatigiikuutaat sulisinnaasut akornini illoqarfinni nunaqarfinnilu isertitatigut assigiinngissuteqarnerujussuit erseqqipput, ukioqatigiiaanilu utoqqaanerusuni inuusunnerusunilu isertitat assigiiaarnerullutik.
Titartagaq 2.6. 2013-mi inuit ataasiakkaat isertitat tamarmiusut agguaqatigiissillugit ukiuinut suiaassusaanullu immikkoortiterlugit
Najoqqutaq: Naatsorsueqqissaartarfik
2013-mi angutit iseritaat agguaqatigiissillugu 243.000 kr.-iusoq tabel 1-mi takuneqarsinnaavoq arnat agguaqatigiissillugu isertitaat 180.000 kr.-iusoq. Angutit agguaqatigiissillugu isertitaat arnat agguaqatigiissillugu isertitaannit 35 procentimik annertuneruvoq.
Taamatuttaaq suiaassuseq tunngavigalugu isertitanik sanilliussinermi ersersinneqarpoq kommunini, nunaqarfimmi aamma illoqarfinni inunngorsimanerit apeqqutaanngitsut tassa angutit taakkunani aamma isertitaqarnerusut. Immikkoortortaqarfinni inuillu ukiuinut immikkoortiterinermi aamma takuneqarsinnaavoq angutit isertitaasa arnat isertitaannut naleqqiullugu annertunerunerat– taamaakkaluartoq immikkoortortaqarfiit ilaanni arnat angutillu iseritaat assigiipput, immikkoortortaqarfinnili pineqartuni aningaasarsiorneq appasinneruvoq immikkoortortaqarfinnut allanut salinnilliullugu.